Gen 36 | ZomZIV | STEP | Hih in Esau’ (tua pen, Edom) khangsutna ahi hi.

Genesis 36

Esau’ Suante

1 Hih in Esau’ (tua pen, Edom) khangsutna ahi hi.

2 Esau in Canaan pana a lak a zite: Hit mi Elon’ tanu Adah, le Hiv mi Zibeon’ tanu Anah’ tanu Oholibamah - 3 Nebaioth sanggamnu Ishmael’ tanu Basemath zong ahi hi.
4 Adah in Esau tawh Eliphaz, Basemath in Reuel, 5 Oholibamah in Jeush, Jalam le Korah. Hihte pen Canaan a, a neih Esau’ tapate ahi hi.
6 Esau in a zi, a tanu a tapate a innkuanpih khempeuh le a gan khawite le a ganhing dang khempeuh le Canaan a, a lam a neihsa khempeuh tawh a sanggampa Jacob omna pan a gamla simah paikhia hi. 7 Amau neihsa tam lua ahi manin a teng khawm thei kei uh hi; a gan khawite uh hangin amau tenna leitang in a nih un a vak khawm zo kei hi. 8 Tua ahi ciangin Esau (tua pen, Edom) Seir gam mual tungah teng hi.

9 Hih in Seir gam mualtung a, Edom-te pa Esau’ khangsutna ahi hi.

10 Hihte Esau’ tapate’ min ahi hi:
Esau’ zi Adah’ tapa Eliphaz le Esau’ zi Basemath’ tapa Reuel.
11 Eliphaz tapate:
Teman, Omar, Zepho, Gatam le Kenaz. ^a
12 Esau’ tapa Eliphaz in zong a min Timna kici zino khat nei a, amah in tuanu tawh Amalek a nei hi. Hihte in Esau’ zi Adah tupate ahi hi. ^b
13 Reuel’ tapate:
Nahath, Zerah, Shammah le Mizzah. Hihte Esau’ zi Basemath’ tupate ahi hi.
14 Zibeon’ tunu Anah’ tanu Esau’ zi Oholibamah in Esau tawh a neih tapate:
Jeush, Jalam le Korah.

15 Hihte, Esau suante laka ukpite ahi hi: ^c

Esau’ ta upa pen Eliphaz’ tapate:
Ukpite, Teman, Omar, Zepho, Kenaz, 16 Korah, ^{▼▼36.16 Mesoretic Bu Samaritan Pentateuch ( Pc. 36:11 le 1Kh. 1:36 zong en in) in Korah cih nei lo hi.} Gatam le Amalek. Hihte, Edom a Eliphaz’ suan ukpite hi a, Adah tupate ahi uh hi.
17 Esau’ tapa Reuel’ tapate:
Ukpite Nohath, Zerah, Shammah le Mizzah. Hihte Edom a Reuel’ suan ukpite ahi hi; amaute Esau’ zi Basemath tupate ahi hi.
18 Esau’ zi Ohilibamah’ tapate:
Ukpite Jeush, Jalam, le Korah. Hihte, Anah tanu Esau zi Oholibamah suan ukpite ahi hi.

19 Hihte, Esau (tua pen, Edom) tapate le amau’ ukpite ahi hi. ^e

20 Hihte, tua kuala teng Hori mi Seir’ tapate ahi hi: ^f

Lotan, Shobal, Zibeon, Anah, 21 Dishon, Ezer le Dishan. Hihte Edom a Seir’ tapate, Hori ukpite ahi hi.
22 Lotan’ tapate:
Hori le Homam ^{▼▼36.22 Hebrew ah Henam pen Honam tawh kilamdang (1Kh. 1:39 en in)}, Timna pen Lotan sanggamnu ahi hi.
23 Shobal’ tapate:
Alvan, Manahath, Ebal, Shepho le Onam.
24 Zibeon’ tapate:
Aiah le Anah. Hih Anah pen a pa Zibeon laate a cin lai-a sehnel-gama ciktui ^{▼▼36.24 Vulgate; Syriac ah tui mukhia; Hebrew ah hi kammal kician taktak lo.} sa mu pa ahi hi.
25 Anah’ tate:
Dishon le Anah’ tanu Oholibamah.
26 Dishon’ ^{▼▼36.26 Hebrew ah Dishan, Dishon tawh kilamdang.} tapate:
Hemdan, Eshban, Ithran le Keran.
27 Ezer’ tapate:
Bilhan, Zaavan le Akan.
28 Dishan’ tapate:
Uz le Aran. ^j
29 Hori ukpite hihte ahi hi:
Lotan, Shobal, Zibeon, Anah, 30 Dishon, Ezer le Dishan. Hihte Seir gama amau kikhenna zui-a Hori ukpite ahi hi.

Edom a Gam-ukte

31 Hihte, Israel mi kumpi khat beek a om ma a Edom a kumpite ^{▼▼36.31 Ahikeh Israel kumpi khatpeuh in amau a uk ma.} ahi hi:

32 Beor’ tapa Bela, Edom kumpi a suak hi. Ama khuapi min Dinhabah ahi hi. ^l
33 Bela a sih ciangin Bozrah pana Zerah’ tapa Jobab in a kumpiza a luah hi.
34 Jabab a sih ciangin Teman-te gam pan Husham in a kumpiza a luah hi. ^m
35 Husham a sih ciangin Moab gama Midian-te a zo pa Bedad tapa Hadad in a kumpiza a luah hi. Ama khuapi min Avith kici hi. ⁿ
36 Hadad a sih ciangin, Masrekah pana Samlah in a kumpi za a luah hi.
37 Samlah a sih ciangin, gun ^{▼▼36.37 Ahikeh Euphrates} gei-a om Rehoboth pana Shaul in a kumpiza a luah hi.
38 Shaul a sih ciangin, Acbor’ tapa Baal-Hanan in a kumpiza a luah hi.
39 Acbor’ tapa Baal-Hanan a sih ciangin Hadad ^{▼▼36.39 Masoretic Bu; Samaritan Penteteuch le Syraic khutgelh masa tampite (1Kh.1:50 zong en in) Masoretic bu khutgelh khempeuh phial ah Hadar} in a kumpiza a luah hi. A khuapi min Pau hi-in, a zi min Mehetabel hi a, Me-Zahab’ tanu, Matred’ tanu ahi hi.

40 Hihte in Esau’ suan pana a kual le a beh zui-a ukpite min ahi hi:

Timna, Alvah, Jetheth, 41 Oholibamah, Elah, Pinon, 42 Kenaz, Teman, Mibzar, 43 Magdiel le Iram. Hihte, amau laksa a tenna gam uh tawh kizui-a Edom ukpite ahi hi.

Hih in Edom-te pa Esau ahi hi. ^q